له‌م شه‌رحی ده‌ردی غوربه‌ته‌ له‌م سۆزی هیجره‌ته‌
دڵ ره‌نــگه‌ بێ به‌ ئاو و به‌ چاوا بکـــــا عوبـــــــوور !
                                             "حه‌زره‌تی نالی"

"قوربانی تۆزی رێگه‌تم " ئه‌مڕۆ رژانه‌ سه‌ر
جه‌سته‌ی پیاده‌ره‌و که‌ هه‌موو دانه‌ دانه‌ سه‌ر ...

که‌وتن به‌ سه‌ر کراسه‌که‌م ئه‌ی تاکسی ئه‌رێ؟
چه‌ن ساڵی تر که‌ چویته‌وه‌ بۆکان بزانه‌ سه‌ر ...

کووچه‌ی هه‌ناره‌که‌م که‌ له‌ ده‌ستم که‌وت ...!! بڵاو 
بۆوه‌ و قیامه‌تێ ... ! چ عه‌رز که‌م ؟ ئه‌مانه‌ سه‌ر ...

هاتی منن ، منێ که‌ له‌ ئێواره‌ ئه‌ی خودا !
دۆزه‌خ نه‌ما نه‌چم کوره‌ تف له‌و ژیانه‌ سه‌ر ...

باری هه‌تا قیامه‌ت و تا مه‌رگ و تا هه‌نار!
ئه‌ی تاکسی ببوره‌ که‌ وا ئه‌م قسانه‌ سه‌ر ...

دێنێته‌ ئێش و وه‌خته‌ ته‌نانه‌ت ئه‌گه‌ر بڵێم :
"دڵ ره‌نگه‌ بێ به‌ ئاو " و به‌ قورسێکی ژانه‌ سه‌ر

بیخۆره‌وه‌ و تکایه‌ بزانه‌ له‌ کووچه‌ دا
رووحێ که‌ هی ئه‌من بو له‌ ناو ئه‌م زه‌مانه‌ سه‌ر...

گه‌ردانه‌ دا که‌ ون بووه‌ بیدۆزه‌وه‌ و بڵێ :
قوربانی
تۆزی
رێگه‌تم ...*

30/2/1390
تاران

گوڵـ‏م دڵم پڕە له ... هیچ، ئه‏رێ ئه‏زانی شارەکه‏ت؟!
ئه‏مێسته چۆڵ و هۆڵ، بێ هه‏را ...نه تۆ نه دارەکه‏ت!

که سێبه‏ری ئه‏که‏وته حه‏وشه‏مان، نه کۆترێک نه که‏س!
که بێته کووچه ... کایه‏یه‏ک ... ! نه زەردەیه‏ک له زارەکه‏ت

که وەک په‏پووله هه‏ڵفڕی به باڵی سه‏وز و سوورەوە !*
بەرەو پیادەرەو به‏رەو شه‏قامه نادیارەکه‏ت !

ئه‏مێسته ئه‏م وەتاغه
من
دیازپام
خه‏ون
مه‏رگ...
نه نووکه‏یه‏ک ، له تاکه زەنگه‏کانی جار و بارەکه‏ت !

له بیرته پێت وتم : ئه‏بێ بڕۆم ، ببورە تۆ له بیر ... !
که داکه‏وت له دەسته زەردەکانی من
         هه
‏                نا
                     رە
                         که ت‏...

تلۆر تلۆر، به‏رەو پیادەرەو ...وتت : ببوورە لێم
ئه‏بێ …
ئه‏بێ بسڕمه‏وە …
بسڕمه‏وە ژومارەکه‏ت !

...

گوڵم
دڵم پڕە له دەرد و کوڵ
ئەڵێم بڕۆم له شارەکه‏ت...!**

89/10/10
تاران

* له‏و دێرەی مامۆستا سوارەی ئیلخانیزادە وەرگیراوە :
من ئه‏ڵێم په‏پووله‏یه‏ک فڕی به باڵی سه‏وز و سوورەوە
**هی مامۆستا سوارەی ئیلخانیزادەیه

 ...
بۆ روومانگ

کۆمه‏ڵێ ماچ و په‏پووله‏ که دە دوازدە نه‏فه‏رن !
جادەیه‏ و
مه‏مک و هه‏ناریش له گه‏ڵم هاوسه‏فه‏رن !

بۆنی خاک ،
خاکی سه‏فه‏ر ،
کۆچ ،
غه‏ریبی ،
تاسه‏ت...
مینی بووسێک و هه‏رایەک دەڵێ: ئادەی دە وەرن !

شاعیرێکیش که منم دەستی له سه‏ر شانی هه‏نار!
شێعرەکانی
خه‏مه‏کانیم
لە سه‏تا سه‏ت له‏به‏رن !

ئه‏چمه مێعراجی مه‏مک
- دەبمەوە بەر -
ڕادەچه‏نم!!
وەکو ئه‏و شاپه‏ڕی ماچانه له گۆنات
ئه‏وەرن !

غه‏زەلێک رەنگه له دایک...!
کورە گازی دە بڕۆ !
خەڵکی ئه‏م شارە له تاسه‏ی دڵی من بێ‏خه‏به‏رن !

خه‏م چرۆی داوە لە ناو سینگ و هه‏ناسه‏م له‏وەتا ...
مه‏مکه‏کانت که جگه‏ر گۆشی منن ده‏سبه‏سه‏رن!!*

89/05/19  

* له‏و شێعرەی نالی وه‌رگیراوە:
شێعرەکانم کە جگه‏رگۆشی منن دەربه‏دەرن!
دڵی نالی چ رەقه‏ قه‏ت خه‏می فه‏رزەندی نیه !

وەک مه‏لێکی لانه‏واز پێم وا نه‏بوو قەت پێوە بم !
رەنگه راپۆرتم له سه‏ر بووبێ له گه‏ڵ ئه‏و سێوە بم !

کامه‏؟هه‏ر ئه‏و سێوە حه‏ووا...؟ نا کورە سێو ها له کوێ؟
چارەنووس وابو بە تاسه‏ی دوو دەنک هه‏رمێوە بمـ ...

...رم هه‏تا چیرۆکی عه‏شقی ئێمه‏ دارێژن ، ئه‏من
رەنگه‏ له‏م خیابانه‏ به‏ شوێن کاف و واو و زێوە بم !

دەنگی ماملێ و رێگه‏یه‏ک تا بێنه‏هایه‏ت تا خودا !
کاکی رانه‏ندە ئه‏رێ چه‏ن ساڵ ئه‏بێ به‏م رێوە بم ؟؟

"خاکی کووچه‏ی یارەکه‏م!"*بێدەنگی که ! وست! وست! ئه‏لۆ:
دادە گه‏ر ئیزنت لە سه‏ر بێ خاکی کوچه‏ی ئێوە بم !

ئه‏بمه‏ چیرۆک یا غه‏زەل یا هه‏رچی پێت خۆشه‏ به‏ڵام
تا هه‏تایه‏   تا هه‏تایه  تا هه‏تا  بمڵێوە بم...

۱۲/۴/۸۹

* گۆرانییه‏کی مامۆستا محه‏مه‏دی ماملێیه

سه‏ره‏تا سیفر و فشه‏ی شین و ره‏شی ده‏ستوورت!!
که‏ڕه‏تێ عه‏شقی سکاڵاوی خه‏مێکی سوورت!!

تا سپی بوونی هه‏ناسه‏ی ته‏مه‏نی ئه‏م خه‏ونه!
ره‏گه‏زی ماچ ئه‏به‏خشم به رقی ئه‏ستوورت!!

قڕی هاتووه غه‏زه‏لی پێنج و شه‏شی سه‏رشێتیم!
خۆ ده‏هاوێمه‏وه ئامێزی گڕی ته‏ندوورت!!

من له پاڕانه‏وه‏کانی سه‏فه‏را ئاوا بووم...
هه‏ر له باکووره‏وه بۆ سه‏وزه چیای باشوورت!!

پێم وتی ئه‏م غه‏زه‏له‏ت پێشکه‏شه!ناقابیله!!
پێت وتم رۆڵه برۆ!کۆی که‏وه‏ داشقه‏ی توورت!!!!

                                                        ۱۷/۱۲/۱۳۸۳

منیش گه‏وره ده‏بم!!

چ خه‏یاڵاویه ئه‏م شێعره گڕی گرتووه بۆت!
له گه‏رووی گه‏رمی هه‏نارێکه‏وه پشکوتووه بۆت!

به خودا ئه‏م قسه قۆڕانه که تۆ ده‏یبیستی
زایه‏ڵه‏ی وشکی دڵێکی شه‏که‏ت و تینووه بۆت!!

له ته‏نیشت باروبنه‏ی سه‏وزی غه‏زه‏ل تاکو به‏یان
چ شه‏وو نیوه شه‏وی تاڵی به سه‏ر بردووه بۆت!!!

سه‏گه لاساری دڕی شێت و شڕی ناو دڵه‏که‏م
ئه‏وه چه‏ن رۆژه به دینت که‏ره!عاقڵ بووه بۆت!!

چ بڵێم بێ ئه‏ده‏بیشه! ئه‏ده‏بیشه به سه‏رت
له به‏ری پێمه‏وه تا ته‏وقی سه‏رم خه‏وتووه بۆت!!

تا کو هاتم لە سەر ئەو سینگه رەقەت گوڵ بچنم
زوو وتت گه‏وجه مه‏که! ئێسته مناڵی زووه بۆت!!!

                ۶/۵/۱۳۸۳                  

شێت بوون تا....

شان به شانی هه‏وه‏سێکا / تۆ/ و /من/ و / تۆو/ ده‏ترووکێنن
له خه‏ڵوه‏تی بێ سه‏رو شوێنی ژنێک / رووت/ ئه‏تسووتێنن

هه‏مو شه‏وێ به ده‏م شه‏یتانی بوونی غه‏زه‏له‏کانت...
تا زیندوو بوون قاقا خوێن له قامه‏تی وردبووت ئه‏خوێنن

له دوی نیگای ره‏شی ره‏حه‏ت بوونێکی ئه‏به‏دی وێڵن
/هه‏تا هه‏تایه ده‏وری جوانیه/ و چی تر ئه‏رووخێنن

/سپی سپی/ له تابووتی هه‏وه‏سه‏کانیان ئه‏تنێژن
/ره‏ش ره‏ش/ له بۆگه‏نی رشانه‏وه‏ی خۆیان ئه‏تخوڵقێنن

له وه‏تاغێک پراوپر هه‏وه‏سی جگه‏ره‏یه‏ک و خۆم
مه‏ست له تۆ تر/کێ؟/ ماچ له /من/ ترین غه‏زه‏لم ده‏ستێنن

جه‏سته‏ت ئه‏که‏نه‏ شه‏ڵاڵی شه‏هوه‏ت و /قا قا/ تروکان
/قا قا/ ئیمان به قه‏ڵافه‏تی جه‏سته‏یه‏کی تر دێنن...
                                   
                                                                  ۱۱/۳/۱۳۸۳

"په‏نجه‏ره‏یه‏ک روو به شه‏قام"

ئه‏وینێک،به قه‏رای ژانێک،ژیانێک،چاوتروکانێک
له‏گه‏ڵ تۆ بوون هه‏تا تۆبه له هه‏وه‏س و تا نه‏مانێک

هه‏ناسه‏یه‏ک تا کۆتایی ئه‏م سه‏فه‏ره و سه‏ره‏تایه‏ک...
بۆ یاخی بوون له ده‏س یاسای ئایه‏ته‏کانی یه‏زدانێک

حیلکه حیلکی ده‏وڵه‏مه‏ندێک تا بێ سنوورترین زه‏ریا
پڕ به دەشتی وشکه‏ڵاتوی ده‏سته‏کانی باخه‏وانێک

گه‏ڵا گه‏ڵا گۆنای زه‏ردی کچۆڵێکی باوک مردوو
ئا..ا..خ پاییز! ورد و خاش بووه له ژێر پێله‏قه‏ی کۆڵانێک

توونی ترین غه‏زه‏له‏کان مه‏نفا ده‏کرێنه سه‏ر دڵم و
هه‏مو شێت شێت تینوو بۆ ماچی دڵۆپه بارانێک

ره‏نگه ئێستێ ره‏ق هه‏ڵاتبێ ئه‏و پیره پیاوه‏ی که دوێنێ
ته‏ق!ته‏ق! ده‏رکه‏ی ئاواته‏کانی ئه‏کوتا بۆ له‏ته نانێک

ئه‏بمه‏وه مناڵ و له سه‏ر ئه‏سفاڵتی به‏ر ده‏رگه‏که‏‏مان
باڵا به باڵای گوڵاڵه‏کان ئه‏کێشمه‏وه جیهانێک....

                                                                  ۵/۲/۱۳۸۳      

" نه‏ورۆز"

ده‏سی له‏رزۆکی سروه‏یه ،په‏نجێره‏ی نیوه‏تاک ئه‏کوتێ

ده‏رکه‏ی حه‏ز و خولیاکانی دژ به شه‏وی سامناک ئه‏کوتێ

 به سه‏ر چوونی وه‏رزی ره‏شی شه‏خته‏ی هه‏ڵه‏بجه‏وئه‏نفاله

کڵۆ کڵۆ توانه‏وه ،که‏لاک له سه‏ر که‏لاک ئه‏کوتێ

 زرمه‏ی چه‏کوچی پۆڵایینی حه‏قیقه‏تێکی ون بوویه

ئه‏مڕۆ مێشکی بۆگه‏نیوو جه‏سته‏ی وردبووی زوحاک ئه‏کوتێ

 دارستانێکی ته‏ماوی و هه‏ناسه‏کانی خۆره‏تاو

ته‏نیا ته‏نیا رێگه‏ی سه‏ختی ئاسۆیه‏كی رووناک ئه‏کوتێ

 دایکم ته‏رمی گوڵه مێلاقه‏کانی حه‏وشه ده‏نێژێ و

هه‏ر ئێسته‏که له دارستان چرۆیه‏ک سینگی خاک ئه‏کوتێ

                                                                 به‏هاری 1383

 خۆر

بۆیه ریپۆقی له برژانگی گڕی گرتووه خۆر
چاوی زێڕینی به ده‏ستی ره‏شه‏با رشتووه خۆر

چه‏نده شه‏رمێون و دڵناسکه سا سه‏یری که‏ن
له گه‏مارۆی په‏ڵه هه‏ورانی گه‏دا که‏وتووه خۆر

چ بوو رێو ره‏سمی ئه‏وینداری له بیر جۆوه له پڕ
کورته چیرۆکی چه‏په‏ڵخانه له کێ فێر بووه خۆر؟؟

که ده‏بینن گوڵه ئه‏ستێره هه‏مو پڕش و بڵاو
له‏شی به‏رته‏سکی به ناخی شه‏وه زه‏نگ رۆچووه خۆر

هه‏سته سه‏ر پێ که به قه‏د قامه‏تی ئه‏م شاره هه‏مو!
تیشکی گۆنا بدره‏وشێنه هه‏تاکو زووه خۆر!

با نه‏ده‏ن تانه له تاقانه کچۆڵه‏ی ئاسمان !
با نه‏ڵێن شه‏و به ته‏مای چی له گه‏ڵی نووستووه خۆر!

                                                                     3/11/82
شه‏و

له پرچی لوولی ئاسمان چرۆی تیشک روا بو شه‏و
سنووری سه‏وزی شێعری ته‏ڕ به جارێ تێک شکا بو شه‏و

له پشت کراسی کون کون و ره‏ش و شڕی به‏ر ئاسمان
به‏ڵێنی رۆژی روون و تیشکی خۆره‏تاوی دابو شه‏و

خه‏ڵوزی ته‏رمی په‏رپه‏رۆک له سووچی پیاڵه که‏وتبو
بڵێسه‏ی ئاگری شه‏میش ئه‏سیری ده‏ستی با بو شه‏و

له ژێر نیگای گوڵاڵه‏کان و باوه‏شێنی شۆره‏بی
کوری گه‏دا له خه‏ونی دا له‏سه‏ر سه‏رینی شا بو شه‏و

له ناو ته‏م و مژ و ته‏وژمی دووکه‏ڵی هه‏ناسه‏کان
له سه‏ر جه‏سه‏ی کچێنی شاری مردو راکشابو شه‏و

به‏ چاوی کوێر و پڕ له خوێن و خه‏ون و تاسه پێکه‏نی
که سه‏یری کرد شه‏قامی شاری بێ‏به‏ری نیگا بو شه‏و

له سه‏ر ته‏وێڵی پڕ له تیشکی خۆره‏تاو ئه‏نوسمه‏وه
که ژوانی چۆڵی بێکه‏سی من و وشه‏ و خودا بو شه‏و!

                                                                  17/6/82

"کزه‏با"

ده‏خزێ که‏ له ئامێزی کزم ده‏ستی کزه
داده‏گرێ له‏شم له‏رزی ته‏زووی هه‏ستی کزه

بێ‏ره‏حمه له گه‏ڵ چه‏پکه‏گوڵی رومه‏تی یار!
سه‏رسامه دڵم ،ده‏ڵێم چلۆن گه‏ستی کزه

مل که‏چ که به‏ره‏ووته‏وه دێ لێت وه‏ره‏زه !!
بایی نه‏بی پێت وا نه‏بێ سه‏ربه‏ستی کزه

کاتێ دڵی سیست چه‏قه‏ره‏ی دا له‏ ئه‏وین!!
ئه‏و کاته بڵێ که شێت و سه‏رمه‏ستی کزه!

به‏س به‏رده سوپای پووش و په‏ڵاشت له خه‏ڵک!
وا دیاره به چاوی ره‏شی ناوه‏ستی کزه!!

                                                           5/2/1382

"به‏هار"

گه‏زیزه وا له به‏ر سه‏هۆڵی سه‏رد و سڕ تکا ده‏کا
که بێته ده‏ر له بن به‏فر خودا خودا خودا ده‏كا

گزنگی خۆر ئه‏دا له روومه‏تی سروشت کوری به‏فر
له مه‏مکی سه‏وزی سه‏ر زه‏وی به شین و رۆوه را ده‏کا

به سروه پێکه‏نینی دێ چڵی نزاری ویشکه‏دار
که باسی هاتنی گوڵ و شکۆفه‏و و گه‏ڵا ده‏کا

نه‏ما سنووری سووره‏گوڵ که بولبول هات و چۆیه‏تی
له خۆشی ماچی روی گوڵه که پر به دڵ هه‏را ده‏کا

چریکه دێ له ناخی ئاسمانی روونی ساڵی نوێ
مناڵه‏که‏ی هه‏ڵه‏بجه‏یه له‏گه‏ڵ په‏ری سه‏ما ده‏کا!

                                                           28/12/1381